Ivana R., blogere e njohur në Serbi, është arrestuar si e dyshuar për ndihmë ndaj Faton Hajrizit, të dyshuarit për vrasjen e policit serb. Ajo bashkë me partnerin e saj, Zoran R, u arrestuan në Bosnjë Hercegovinë. Siç raportojnë mediat serbe, të dy këta kanë siguruar transportin për Faton Hajrizin, i cili u shpall në kërkim pasi dyshohet dhe akuzohej se kishte vrarë një efektiv policie serb. Ndërkohë pas më shumë se 40 orësh kërkimesh ai u lokalizua dhe ekzekutua nga policia serbe. I arrestuar për të parën herë në vitin 2000 për vrasjen e një ushtari rus, Faton Hajrizi nga Komuna e Skenderajt, do të shndërrohej në një person me histori të gjatë kriminale dhe famë për shumë arratisje nga burgjet e Kosovës. Për të fundit herë ai u arratis nga një burg i tipit të hapur në Kosovë, më 6 korrik të vitit 2024. Pak ditë më vonë u bë i dyshuar për vrasjen e një polici në Serbi dhe u vra deri sa ishte në arrati nga autoritetet serbe më 19 korrik. Në kohën e arratisjes së fundit nga Kosova, Faton Hajrizi përshkruhej si një i burgosur i disiplinuar, i cili madje kishte fituar të drejtën për të shkuar në shtëpi në fundjavë.