Nuk ka qetësi për Indinë e gjunjëzuar nga Covid 19. Teksa vendi bën llogaritë me viktimat e pandemisë dhe përhapjen e vrullshme të variantit të ri që i vendosi përpara një sprove të fortë autoritetet e sistemin e tij shëndetësor, rajonet perëndimore po përgatiten për mbërritjen e ciklonit më të fuqishëm që ka parë kjo zonë prej dekadash të tëra. Tauktae pritet të përplaset mbi rajonin e Guxharatit me një forcë shkatërruese. Përgjatë dy ditëve te fundit, stuhia ka lëvizur në rajonet bregdetare duke lënë pas 6 të vdekur e mijëra të evakuar. Ekspertët indianë të metereologjisë thanë se stuhia është intensifikuar ndjeshëm, duke u rreshtuar tani në kategorinë e një “cikloni tepër të rrezikshëm”. Si Guxharati, ashtu dhe Maharashtra, janë vënë në gjendje alarmi. Njerëzit janë këshilluar të mos dalin nga shtëpitë, teksa priten përmbytje masive nëpër rrugë, dëmtim i linjave të tensionit të lartë dhe rrëzim pemësh. Një ciklon i ngjashëm në vitin 1998 vrau të paktën 4 mijë vetë në Indi, edhe pse mendohet se bilanci real i viktimave mund të ketë qenë shumë më i lartë.