Pentagoni ka anuluar planet për vendosjen e përkohshme të 4 mijë trupave amerikane në Poloni, në një lëvizje që po ngre pikëpyetje mbi planet e administratës së Donald Trump për reduktimin e pranisë ushtarake amerikane në Evropë. Sipas dy zyrtarëve amerikanë të cituar nga Reuters, vendimi është marrë vetëm pak javë pasi Pentagoni njoftoi tërheqjen e 5 mijë trupave nga Gjermania, në mes të tensioneve mes Uashingtonit dhe aleatëve evropianë lidhur me luftën me Iranin. Burime amerikane thanë se anulimi i dislokimit në Poloni lidhet me një plan më të gjerë për rishikimin e pranisë ushtarake të SHBA-së në Evropë. Aktualisht, rreth 35 mijë trupa amerikane janë të stacionuara në Gjermani, ndërsa në total kontinenti europian ka rreth 85 mijë ushtarë amerikanë. Administrata Trump prej kohësh ka kërkuar që vendet e NATO-s të marrin më shumë përgjegjësi për mbrojtjen e kontinentit dhe të rrisin shpenzimet ushtarake. Sipas raportimeve, Trump është shprehur i pakënaqur edhe me faktin që aleatët evropianë nuk mbështetën operacionet amerikane në luftën kundër Iranit.