Kryeministrja e Italisë, Giorgia Meloni, deklaroi se nuk do të lejoj që Italia të bëhet kampi i refugjatëve të Evropës, deklaratë që vjen pas bumit të lartë të emigrantëve të paligjshëm në vendin e tyre. Gjatë deklaratës në Asamblenë e Përgjithshme të Kombeve të Bashkuara në New York, liderja italiane tregoi se Italia është nën presion të paqëndrueshëm për shkak të strehimit të më shumë se 8500 emigrantëve në ishullin e Lampedusa-s. ANSA raporton se Meloni ka hedhur poshtë kritikat ndaj Memorandumit të Mirëkuptimit që BE-ja ka nënshkruar me Tunizinë për bashkëpunim në ndalimin e trafikantëve me qenie njerëzore që përdorin brigjet e saj për të nisur anijet me emigrantë. “Është e rëndësishme që memorandumi me Tunizinë të çohet përpara .Është një model për t’u përdorur edhe me kombet e tjera”, deklaroi ajo. Kryeministrja italiane ka përqëndruar vëmendjen në ndërgjegjësimin e situatës së emigrantëve dhe përpjekjet për më shumë solidaritet. Dy ditë më parë qeveria e Melonit miratoi një paketë me masa të ashpra për të kufizuar emigrimin e paligjshëm përmes Mesdheut, duke e rritur periudhën e ndalimit nga 6 në 18 muaj. Pamjet: AFP