Parlamenti i Turqisë ka miratuar një ligj të ri që ndalon aksesin në mediat sociale për personat nën 15 vjeç, në një përpjekje për të rritur kontrollin mbi përdorimin e platformave dixhitale nga të miturit. Sipas raportimeve të Anadolu Agency, ligji parashikon që të miturve nën këtë moshë t’u ndalohet regjistrimi në rrjetet sociale, ndërsa platformat do të detyrohen të vendosin sisteme të verifikimit të moshës. Mediat turke raportojnë se prindërve do t’u jepen mjete për të monitoruar kohën që fëmijët kalojnë para ekranit, si dhe shpenzimet që ata kryejnë online. Gjithashtu, në raste emergjente, platformat kryesore do të detyrohen të ndërhyjnë brenda një ore për të kufizuar përhapjen e përmbajtjeve të dëmshme. Ligji pritet të hyjë në fuqi gjashtë muaj pas publikimit në Gazetën Zyrtare. Ndërkohë, diskutime të ngjashme po zhvillohen edhe në vende të tjera. Presidenti francez Emmanuel Macron ka propozuar një “ditë pushimi” mujore nga rrjetet sociale për të rinjtë, me qëllim rikthimin e tyre tek aktivitetet në jetën reale, si leximi apo sporti. Po ashtu, Presidentja e Komisionit Evropian Ursula von der Leyen dhe liderët e disa vendeve të Bashkimi Evropian kanë diskutuar vendosjen e kufizimeve të ngjashme për aksesin e fëmijëve në mediat sociale, një nismë që po fiton gjithnjë e më shumë mbështetje në Evropë.