Ministrja e Brendshme, Albania Koçiu, paralajmëron rishikim të masave të sigurisë nëpër gjykata, pas vrasjes së gjyqtarit Astrit Kalaja brenda sallës së gjyqit, që tronditi mbarë vendin. “Do të rishikojmë masat e sigurisë në gjykata, e jo vetëm. Në përfundim, do të hartojmë një paketë të plotë, duke përfshirë rishikimin e protokolleve të bashkëpunimit mes Policisë së Shtetit dhe institucioneve të drejtësisë; Forcimin e sigurisë fizike brenda dhe përreth ambienteve të gjykatave; si dhe një sistem të integruar monitorimi inteligjent për të parandaluar e neutralizuar çdo akt dhune”. Në pamundësi për të mbajtur qëndrimin e saj në Kuvend, për shkak të debateve të forta nga opozita, ministrja Koçiu ka një mesazh për forcën kundërshtare. “Jeta e çdo njeriu, aq më tepër e një shërbëtori të drejtësisë të rënë në krye të detyrës nuk mund të përdoret për kapital apo interesa të ngushta politike. Sot nuk është koha për të drejtuar gishtin apo për të kërkuar fajtorë politikë. Është koha për bashkëpunim institucional mes të gjitha pushteteve dhe aktorëve përgjegjës”. Ndërsa iu shpreh ngushëllime familjarëve të gjyqtarit të ndjerë, ministrja e Brendshme shpreh gjithashtu angazhimin për rishikimin e kornizës së mbrojtjes vetjake të magjistratëve në detyrë.