Rusia dhe Ukraina kanë hyrë në një armëpushim treditor të shpallur nga presidenti amerikan Donald Trump, në prag të Paradës së Ditës së Fitores në Moskë. Presidenti ukrainas Volodymyr Zelensky urdhëroi ushtrinë të mos sulmojë paradën në Sheshin e Kuq, ndërsa Kremlini forcoi masat e sigurisë pas valës së sulmeve me dronë ukrainas ndaj objekteve strategjike ruse. Për herë të parë në afro dy dekada, parada në Moskë do të zhvillohet pa ekspozim të pajisjeve ushtarake. Presidenti i Ukrainës, ra dakord të respektojë armëpushimin treditor të shpallur nga presidenti Trump, ndërsa Rusia mban paradën e saj vjetore të Ditës së Fitores. Megjithatë, një seri sulmesh ukrainase me rreze të gjatë ndaj objekteve energjetike javët e fundit e detyruan Kremlinin të forcojë masat e sigurisë dhe të reduktojë festimet e këtij viti, ku për herë të parë në pothuajse dy dekada nuk do të ketë pajisje ushtarake në paradë. Trump njoftoi të premten se një armëpushim treditor mes palëve do të hynte në fuqi sot. “Shpresojmë që ky të jetë fillimi i fundit të një lufte shumë të gjatë, vdekjeprurëse dhe të ashpër”, shkroi Trump në rrjetin e tij Truth Social, duke shtuar se armëpushimi do të shoqërohej edhe me një shkëmbim të burgosurish. Zelensky firmosi të premten një dekret që urdhëron ushtrinë ukrainase të mos sulmojë paradën dhe, në një deklaratë të veçantë, “Sheshi i Kuq është më pak i rëndësishëm për ne sesa jetët e të burgosurve ukrainas që mund të kthehen në shtëpi”, tha Zelensky. Ukraina kishte hedhur poshtë një armëpushim të përkohshëm të propozuar nga Rusia dhe Zelensky paralajmëroi aleatët e Rusisë të mos merrnin pjesë në paradë. Rusia kishte kërcënuar me një sulm masiv në zemër të Kievit nëse Ukraina sulmonte dhe u kishte bërë thirrje diplomatëve të huaj të largoheshin nga kryeqyteti ukrainas. Për herë të parë në afro 20 vite, Moska do ta zhvillojë paradën në përmasa më të vogla, pa pajisje ushtarake të ekspozuara në Sheshin e Kuq dhe me një numër më të ulët personalitetesh. vetëm liderët e Bjellorusisë, Malajzisë dhe Laos-it, si edhe kryeministri sllovak Robert Fico kanë udhëtuar drejt Moskës. Të dyja palët vazhduan sulmet edhe të premten, para njoftimit të Trump. Forcat ajrore ukrainase thanë se Rusia kishte lëshuar 67 dronë gjatë natës, numri më i ulët në pothuajse një muaj. Rusia tha se kishte rrëzuar më shumë se 400 dronë ukrainas 100 prej tyre që synonin Moskën. Kievi deklaroi se kishte goditur dy rafineri ruse ndersa Rreth 13 aeroporte në jug të Rusisë u mbyllën të premten pasi një dron ukrainas goditi një qendër navigimi ajror në qytetin jugor Rostov-mbi-Don