Shefja e Bashkimit Evropian, Ursula von der Leyen, ka bërë të ditur të premten që blloku evropian do t’ia dërgojë Ukrainës 1.5 miliard euro, të cilat i ka siguruar prej aseteve të ngrira ruse në territorin e BE-së. “Sot, ne transferojmë 1.5 miliard euro të hyra të siguruara prej aseve të ngrira ruse, me qëllim të rindërtimit dhe mbrojtjes së Ukrainës. Nuk ekziston mundësi më e mirë për t’i shfrytëzuar paratë e Kremlinit, sesa që ta bëjmë Ukrainën, dhe gjithë Evropën, një vend më të sigurt për të jetuar”, ka thënë von der Leyen përmes një postimi në X, platformë e njohur më parë si Twitter. Pas nisjes së luftës së Moskës në Ukrainë, në shkurt të vitit 2022, Perëndimi ka ngrirë asete ruse në vlerë të 276 miliardë eurove. Grupi i shtatë vendeve më të industrializuara në botë ka vendosur muajin e kaluar që t’i japë një kredi Ukrainës në vlerë të 50 miliardë dollarëve, me paratë e gjeneruara nga asetet e ngrira ruse. Moska, në anën tjetër, ka ndërmarrë masa ligjore kundër këtij vendimi. Kryeministri ukrainas, Denys Shmyhal, është deklaruar mirënjohës ndaj BE-së. Shumica e fondeve të ngrira ruse, rreth 210 miliardë euro, janë duke u mbajtur në Evropë, ndërsa rreth 10 miliardë dollarë janë në Shtetet e Bashkuara. Asete ruse në vlerë të miliarda dollarëve ka edhe në Japoni dhe Britani. Pamjet: AFP