Nuk dihet nëse Papa i ri Leoni i 14-të do të ecë në gjurmët e Papa Franceskut, i cili zgjodhi Shqipërinë në shtatorin e vitit 2014 si vendin e parë për të vizituar pasi u zgjodh Papë. Por ftesa për të vizituar vendin tonë i ka shkuar tashmë. Ka qenë Ipeshkvi i Dioqezës të Rrëshenit, imzot Gjergj Meta ai që ka takuar Atin e Shenjtë në Vatikan në Udiencën e Përgjithshme të së mërkurës. Në njoftimin e shpërndarë nga Dioqeza e Rrëshenit, thuhet se imzot Gjergj Meta e ftoi Papën të vizitojë Shqipërinë. Gjatë takimit dhe përshëndetjes me Atin e Shenjtë, Papa Leonin e 14, Imzot Gjergji i tregoi atij se të dielën e kaluar, së bashku me shqiptarët katolikë të Italisë, janë lutur për të në Shenjtëroren e Zojës së Këshillit të Mirë, në Genazzano. Gjithashtu, në emër të ipeshkvijve dhe të Kishës Katolike në Shqipëri, e uroi Atin e Shenjtë për zgjedhjen e tij si Pasardhës i Pjetrit dhe e ftoi atë që të vijë në vendin tonë.