Gjendja e Papa Françeskut vazhdon të jetë kritike, teksa kreu i Kishës Katolike kaloi një natë të qetë, sipas asaj që raporton vetë Vatikani. Gjithsesi, rrjeti duket se po “gumëzhin” se Vatikani është duke gënjyer sa i përket shëndetit të Papës, me një postim që shkruan se në të vërtet ai ka ndërruar jetë pasditen e së dielës. “Me dhimbje të thellë, njoftojmë ndarjen nga jeta të Atit tonë të Shenjtë. Papa Françesku u fut në prehjen e përjetshme, në Spitalin e Romës. Falënderojmë për shërbimin e tij besnik dhe lutemi për prehjen e shpirtit të tij. Faleminderit për udhëheqjen, dhembshurinë dhe shërbimin tuaj të palëkundur ndaj Kishës. Prehu tani në përqafimin e përjetshëm të dashurisë së Zotit”, shkruhej në postimin që u bë viral në rrjetet sociale. Por ka qenë vetë Vatikani që i ka hedhur poshtë këto pretendime, duke shkruar mëngjesin e së hënës, se Papa kaloi një natë të qetë, teksa tani po pushon. Me mijëra besimtarë kanë shkuar në Vatikan, duke u lutur për shëndetin e tij, pasi të shtunën, Françesku pësoi disa probleme me frymëmarrjen, me mushkritë që dolën jashtë funksionit.