Ka qenë një natë e qetë kjo për papa Franceskun, prej 11 ditësh të shtruar në Poliklinikën e njohur Gemelli të Romës. Selia e Shenjtë njoftoi se kreu i Kishës Katolike po pushon, por mediat thonë se gjendja e tij vazhdon të mbetet kritike pasi një ditë më parë, vec problemeve me mushkëritë, u konstatua edhe një insuficiencë e lehtë renale. Françesku ishte në gjendje të rëndë të shtunën pasi pësoi një krizë astme duke iu dashur të merrte oksigjen në doza të larta. 88-vjeçari cili është shtruar në spital jave me një infeksion kompleks në mushkëri, mori transfuzion gjaku gjatë fundjavës pasi analizat treguan vec të tjerash edhe gjurmë anemie, tha Vatikani. Papa i cili vuan nga një sëmundje kronike e mushkërive, u shtrua në spitalin Gemelli më 14 shkurt, pasi një bronkit që kishte pasur për një javë, u përkeqësua. Teksa gjendja e tij mbetet shqetësuese, kanë nisur diskutimet mbi atë cfarë ndodh në rast se At ii Shenjte vdes, ngjarje kjo që do t`i hapte rrugën një serie zhvillimesh me një koreografi të përvijuar qartë ndër shekuj, me disa tradita tradita të Vatikanit të cilat datojnë që nga Roma e lashtë. Kështu është detyra e camerlengo-s (një zyrtar i lartë i Vatikanit) që të konfirmojë vdekjen e një pape. Aktualisht, ky pozicion mbahet nga kardinali me origjinë irlandeze Kevin Farrell. Vdekja e Papës do të pasohet nga nëntë ditë zie, periudhë kjo e njohur si Novendiale, një zakon romak i lashtë. Zakonisht, Italia po ashtu shpall një periudhë zie kombëtare. Trupi i Papës do të bekohet, do të vishet me petkat papnore dhe do të ekspozohet në Bazilikën e Shën Pjetrit ku qindra mijëra do të rreshtohen për të bërë nderimet e tyre, duke përfshirë personalitete të huaja dhe liderë botërorë. Funerali i Papës ka shumë të ngjarë të mbahet në sheshin e Shën Pjetrit katër deri në gjashtë ditë pas largimit të tij nga jeta. Dy deri në tre javë pas funeralit të Papës, Kolegji i Kardinalëve do të mblidhet në Kapelën Sistine për të mbajtur një konklavë, që ështëprocesi shumë i fshehtë i zgjedhjes së një Pape të ri.