Papa Françesku kritikoi ashpër Donald Trump dhe Kamala Harris teksa e përshkroi situatën për votuesit amerikanë në kushtet kur ata duhet të bëjnë “zgjedhjen e së keqes më të vogël”. Ai i konsideroi politikat anti-emigrante të ish-presidentit Donald Trump dhe mbështetjen e Zëvendës Presidentit Kamala Harris për të drejtat e abortit, si të dyja “kundër jetës.” “Qytetari duhet të zgjedhë të keqen më të vogël nga dy të këqijat. Kush është më e vogla nga dy të këqijat? Ajo zonjë apo ai zotëri? Nuk e di”, tha Papa Françesku gjatë një konference për shtyp, duke iu referuar Harris dhe Trump. Papa Françesku, i cili ka qenë më i zëshëm për politikën se paraardhësit e tij dhe ka “lëvizur gurët” për ta bërë Kishën Katolike më të hapur, ka theksuar se çështja e abortit nuk mund të izolohet nga shqetësimet e tjera të të drejtave të njeriut, si emigracioni. “Të largosh emigrantët, t’i lësh ku të duash, t’i lësh ata në mëshirë të fatit… është diçka e tmerrshme. E gjithë kjo ka shumë të ligësi brenda. Të heqësh një fëmijë nga barku i nënës është një atentat, sepse ka jetë. Duhet të flasim qartë për këto gjëra”, tha ai.