Kardinali Robert Francis Prevost, i lindur më 14 shtator 1955 në Çikago, SHBA, është Papa i ri me emrin “Leoni XIV”. Emri i zgjedhur nuk është rastësor, sepse luani është një simbol i forcës, guximit dhe fisnikërisë. Në traditën e krishterë, ai gjithashtu përfaqëson vigjilencë dhe mbrojtje. Duke adoptuar këtë emër, Papa i ri mund të dëshirojë të përcjellë një mesazh energjie dhe udhëheqjeje shpirtërore të ripërtërirë, në një kohë kur Kisha përballet me sfida të shumta si nga brenda ashtu edhe nga jashtë. Robert Francis Prevost është një figurë e rëndësishme e Kishës Katolike, sidomos në raport me Amerikën Latine. 69-vjeçari është Papa i parë amerikan, megjithëse njihet për lidhjet e tij të thella me misionin në Peru dhe për shpirtin e tij ndërkombëtar. Anëtar i Urdhrit të Shën Agustinit, Prevost është formuar në teologji dhe drejtësi kanonike, me një karrierë të gjatë si misionar, profesor dhe udhëheqës fetar. U shugurua meshtar më 1982. Ai ka studiuar edhe në Matematikë e Filozofi, ndërsa më vonë kreu doktoraturën në Romë. Nga viti 2001 deri më 2013, ai ka qenë Prior i Përgjithshëm i Urdhrit Augustinian. Më pas u emërua ipeshkëv i Chiclayos (Çiklajos) dhe shërbeu edhe si administrator i dioqezës së Callao-s (Kajaos). Në vitin 2023, u emërua Prefekt i Dikasterit për Ipeshkvijtë dhe President i Komisionit Papnor për Amerikën Latine, ndërsa më 30 shtator të atij viti, Papa Françesku e krijoi kardinal. Më 6 shkurt 2025, ai u ngrit në Urdhrin e Ipeshkvijve dhe mori titullin e Kishës Suburbikariane të Albanos. Në fjalimin e tij të parë si Papë, zgjodhi të mos flasë anglisht, duke vënë në dukje dimensionin e tij global dhe të përkushtuar ndaj Kishës universale.