Një avion i kompanisë Ryaniar, që fluturonte nga Berlini drejt Milanos, bëri ulje të detyruar në Gjermani, për shkak të kushteve të vështira atmosferike. Autoritete gjermane njoftuan se nëntë pasagjerë mbetën të lënduar nga ulja emergjente e avionit, për shkak të turbulencave të forta nga një stuhi që përfshiu vendin mbrëmjen e të mërkurës. Sipas një deklarate nga policia në Bavari, kushtet e motit e shtynë pilotin të fillonte një ulje emergjente në Memmingen, rreth 70 milje (113 km) në perëndim të Mynihut. Ndërsa avioni u ul në mënyrë të sigurt, nëntë persona midis moshës dy dhe 59 vjeç u lënduan në turbulencën ajrore, tha policia. Një grua pësoi një dëmtim në kokë, fëmija i saj dyvjeçar pësoi mavijosje dhe një grua tjetër 59-vjeçare u ankua për dhimbje shpine, ku të tre morën trajtim spitalor. Linja ajrore ka organizuar një transferim me autobus për në Milano, sepse autoritetet lokale të aviacionit nuk lejuan fluturimet e ardhshme nga Memmingen, tha policia.