Gjykata kushtetuese e Afrikës së Jugut ka dekriminalizuar përdorimin privat të marijuanës në vitin 2018, por vendimi ende nuk është kthyer në ligj. Megjithatë biznesmenët vendas u mblodhën sot në Johannesburg për Panairin e Kanabisit, me qëllim kthimin e ndryshimit në mundësi ekonomike. "Prej vitit 2018 kemi nisur këtë iniciativë dhe shikojmë se qeveria po lëviz ngadalë në drejtimin e duhur për hapjen e industrisë së kanabisit”, thotë një prej organizatorëve. Vizitorë të panairit gjithashtu shpreheshin entuziastë për hapjen. "Jam këtu për lëvizjen e kanabisit në Afrikën e Jugut. Është diçka e re, emocionuese”, tha një prej vizitorëve. David Roke, drejtues i një kompanie të re të prodhimit të kanabis mjekësor, tha: "Jemi listuar si kompani për kanabis mjekësor. Jemi duke ekspozuar disa produkte alternative ndaj duhanit, si dhe projektin e zëvendësimit të mjekimeve opiate me kanabisin mjekësor për trajtimin e dhimbjeve”.