Kjo ishte situata e shkaktuar nga zjarret ne fshatin Gurra të Tiranës, e nisur që prej orës 10 të mëngjesit të së mërkurës. Në këtë zonë mes fshatrave Daias dhe Priskë e madhe, ngado të kthesh kokën, ka tym dhe zjarr…. Zjarri mori përmasa të frikshme gjatë orëve të pasdites, ndërsa rrezikoi edhe jetën zjarrfikësve të Tiranës dhe Kamzës teksa luftonin me flakët. Flakët dolën jashtë kontrollit edhe gjatë mbrëmjes, duke alarmuar banorët e zonës që ndodheshin pranë vatrave. Dy helikopterë furnizoheshin në liqenin e fshatit Gurrë për të larur banesat që të mos rrezikoheshin nga flakët. Situata më kritike u paraqit në Priskë të madhe, ku zjarri u përhap nga era e fortë dhe temperaturat e larta. Disa rrethina të Tiranës ishin nën pushtetin e flakëve, mes tyre edhe në Dajt, në zonën mbi tunelet e Qafë-Mollës.