Këto janë pamjet nga Novosela e Vlorës, ku forcat e ushtrisë nisën evakuimin e banorëve, pas situatën së rënduar nga përmbytjet, për shkak të daljes nga shtrati të Lumit Vjosë. Qytetarët i janë bindur urdhrit të autoriteteve, duke lënë banesat e tyre, të cilat ndodhen në pushtetin e ujit. Emergjencat Civile, forcat e ushtrisë dhe bashkia e Vlorës larguan të parët gratë dhe fëmijët, si dhe banorët e zonave më të rrezikuara, ndërsa më pas kanë evakuuar edhe disa kafshë, që rrezikoheshin nga uji. Prej orësh, emergjencat vijojnë evakuimin e banorëve edhe në Qarkun e Durrësit, ku situata nga përmbytjet është alarmante, me qindra banesa e mijëra hektarë tokë nën pushtetin e ujit. Çarja e argjinaturës së lumit Erzen, përkeqësoi më tej situatën në fshatrat Katund i Ri, Katund Sukth dhe Fllakë, duke përmbytur rreth 500 hektarë tokë bujqësore. Pas urdhrit të dhënë nga bashkia, forcat e emergjencës nisën evakuimet nga këto fshatra. Edhe Lezha po përballet me një situatë alarmante, ku banesat janë rrethuar nga uji, duke izoluar shumë familjarë, përfshi të moshuar e fëmijë. Sipas njoftimit të autoriteteve, të bërë gjatë kësaj të mërkure, të gjithë banorët që do të evakuohen, do të strehohen në ambiente të përkohshme.