Pallati Buckingham ka mohuar se Princi Harry do të qëndrojë në pallat gjatë vizitës së tij në Londër këtë javë, duke kundërshtuar deklaratën e mëparshme të ekipit të Dukës së Sussex, i cili kishte bërë të ditur se ai kishte pranuar një ftesë për t’u akomoduar në rezidencën mbretërore. Sipas Pallatit Buckingham, oferta për akomodim nuk është më në fuqi, pasi afati për pranimin e saj kishte kaluar. Nga ana tjetër, përfaqësuesit e Princit Harry pretendojnë se oferta u tërhoq në momentin e fundit, pasi ai e kishte pranuar zyrtarisht dhe kishte bërë rregullimet e nevojshme për sigurinë e tij. Ekipi i Dukës së Sussex shprehu zhgënjim për zhvillimin, duke deklaruar se Pallati ishte në dijeni të një vendimi të afërt gjyqësor që ndikonte në planet e udhëtimit dhe se mbetet e paqartë pse oferta u anulua pasi ishte pranuar. Princi Harry ndodhet në Mbretërinë e Bashkuar për aktivitetet që shënojnë një vit para zhvillimit të Lojërave Invictus në Birmingham. Në këtë vizitë ai nuk do të shoqërohet nga bashkëshortja Meghan Markle dhe dy fëmijët e tyre, Archie dhe Lilibet. Vendimi lidhet me çështjen e sigurisë së familjes. Harry vazhdon të kundërshtojë heqjen e mbrojtjes policore të financuar nga shteti, e cila iu reduktua pasi ai dhe Meghan hoqën dorë nga detyrat mbretërore në vitin 2020 dhe u zhvendosën në Shtetet e Bashkuara. Burime pranë familjes mbretërore kanë theksuar se Mbreti Charles nuk është i përfshirë në vendimet që lidhen me masat e sigurisë për të birin. Ndërkohë, ekipi i Harry-t ka bërë të ditur se javën e kaluar ai siguroi masa alternative mbrojtjeje, çka i mundësoi të konfirmonte vizitën në Londër. Princi Harry humbi vitin e kaluar betejën ligjore kundër qeverisë britanike për rikthimin e mbrojtjes policore automatike. Ai vazhdon të kërkojë rishikimin e çështjes nga autoritetet përgjegjëse për sigurinë e familjes mbretërore dhe figurave publike.