Rezidentët palestinezë inspektonin sot dëmet në një shtëpi që ishte në qendër të sulmit të ushtrisë izraelite në kampin e Xhenin në veri të Bregut Perëndimor, ku gjashtë njerëz mbetën të vrarë. Ushtria tha se një prej të vrarëve ishte autori i vrasjes së dy kolonëve izraelitë në zonë më herët, në një përshkallëzim të ri të dhunës në konfliktin e rëndë. Dëshmitarët thanë për rrjetin AFP se zjarr armësh të rënda ishte dëgjuar gjatë avancimit të autoblindave, të mbështetura nga helikopterë. Ministria palestineze e shëndetësisë tha se të vrarët ishin një me moshë 49 vjeç, kurse të tjerët në të 20-at. Dy nga 11 të plagosur janë me plagë të rënda. Aksioni në Xhenin vijonte ende sonte, ndërsa një tjetër bastisje po kryhet në një tjetër kamp të zhvendosurish palestinezë në jug të Nablus, sipas raportimeve. Natën e të hënës, kolonë izraelitë kishin sulmuar një palestinez në fshatin pranë vendbanimit, teksa kërkonin hakmarrje për vrasjen e dy izraelitëve disa ditë më parë. Vdekjet e ditëve të fundit nga ushtria kanë shkaktuar zemërim e dënim të gjerë në botë dhe protesta në Izrael për politikat e qeverisë së ekstremit të djathtë të kryeministrit Netaniahu.