Më shumë se 60 vende nënshkruan të shtunën në Hanoi traktatin e parë ndërkombëtar të OKB-së për luftimin e krimeve kibernetike. Ky dokument synon të forcojë bashkëpunimin ndërkombëtar kundër krimeve digjitale, duke përfshirë pornografia me fëmijë, mashtrimet online dhe pastrimin e parave. Sekretari i Përgjithshëm i OKB-së, Antonio Guterres, e quajti nënshkrimin një “hap të rëndësishëm”, por paralajmëroi se kjo është vetëm fillimi. Ai theksoi se çdo ditë, mashtrime të sofistikuara shkatërrojnë familje, dëmtojnë emigrantët dhe rrëmbejnë miliarda dollarë nga ekonomia globale. Megjithatë, kritikat nuk munguan. Organizata për të drejtat e njeriut dhe disa kompani të mëdha teknologjike paralajmëruan për mundësinë e abuzimeve të pushtetit dhe për rreziqet që mund të krijojë për studiuesit e sigurisë kibernetike. “Gjuha e përgjithshme e traktatit mund të përdoret për shtypjen e kritikëve të qeverive,” tha Deborah Brown nga Human Rights Watch. Ajo vuri në dukje se vendi mikpritës, Vietnam, ka një histori të kufizimit të shprehjes së lirë online. Përfaqësues të sektorit teknologjik, përfshirë Meta, Dell dhe Infosys, gjithashtu shprehën shqetësime. Ata paralajmëruan se traktati mund të kriminalizojë hulumtuesit e sigurisë kibernetike dhe mund të lejojë shtetet të veprojnë mbi “çdo akt kriminal që zgjedhin”. Sidoqoftë, vendet demokratike mund ta shohin këtë traktat si një kompromis, pasi përfshin disa dispozita për të drejtat e njeriut. Por shumë aktivistë e konsiderojnë mbrojtjen e këtyre të drejtave si “të dobët”. Lista e vendeve që nënshkruan nuk u bë e ditur plotësisht, por pritet të përfshijë Rusinë, Kinën dhe aleatët e tyre, si dhe shumë shtete të tjera që duan të luftojnë krimin kibernetik.