Në Pakistan disa persona të armatosur kanë vrarë së paku 11 oficerë të policisë duke i zënë në pritë. Sipas autoriteteve vendëse shtatë oficerë të tjerë u plagosën në këtë sulm. Atentati ndodhi në provincën lindore Panxhab, kur oficerët po patrullonin në kërkim të plaçkitësve që veprojnë në atë pjesë të vendit, njoftoi policia. Pakistani është përballur me një rritje të numrit të sulmeve militante në vitet e fundit, por vrasja e një numri kaq të madh të policëve në një sulm të vetëm është gjë e rrallë. Forcat e sigurisë të Pakistanit kryejnë shpesh operacione kundër banditëve në Panxhab dhe në provincën jugore Sindh, ku ata fshihen në zona rurale dhe malore. Ky sulm ishte ndër më vdekjeprurësit ndaj policisë në vitet e fundit, dhe u dënua nga liderët e vendit. Presidenti i Pakistanit, Asif Ali Zardari, kryeministri Shehbaz Sharif dhe ministri i Brendshëm, Mohsin Nakvi, e dënuan sulmin, duke shprehur pikëllim dhe duke i përshkruar oficerët e vrarë si martirë. Ata u lutën për shërimin e shpejtë të oficerëve të plagosur dhe i urdhëruan autoritetet të ndërmarrin veprime të menjëhershme kundër sulmuesve.