Europa po ndjen gjithmonë e më shumë mungesën e ujit. Këto vitet e fundit, në mjaft vende europiane ka rënë pak shi, temperaturat janë rritur dhe verat po bëhen më të nxehta. Pjesë të mëdha të kontinentit të vjetër tani po kërcënohen nga mungesa e uhit dhe thatësira. Sidomos niveli i ujërave nëntokësore po bie në mënyrë shqetësuese. Sipas Copernicus Climate Change Service periudha e thatë do të vazhdojë të përhapet nga Evropa Lindore në të gjithë kontinentin, në të ardhme shumëmë të afërt nga sa mendohej. Më akut, thote DW, problemi shfaqet në Gjermaninë e konsideruar si tradicionalisht të pasur me ujë, por që së fundi po thahet përherë e më shumë. Këtë e tregojnë të dhënat aktuale nga satelitët Grace, të cilat Jay Famiglietti, Drejtor i Global Institute for Water Security në Universitetin e Saskatoon, Kanada, i ka shqyrtuar me porosi të NASA-s dhe Qendrës Gjermane të Hapësirës Ajrore. "Humbja e ujit në Gjermani është rreth 2.5 gigaton ose kilometra kub në vit. Kjo e bën atë një nga rajonet me humbjet më të larta të ujit në botë," thotë Famiglietti. Dy të tretat e planetit blu janë të mbuluara nga uji, por më pak se tre përqind e ujit është i pijshëm. Përveç kësaj ai është i shpërndarë në mënyrë shumë të pabarabartë. Sidomos në shumë zona të Afrikës, Lindjes së Mesme, Amerikës Latine dhe Azisë ka mungesë dramatike të ujit.