Izraeli konfirmoi zyrtarisht vrasjen e liderit të Hamasit, Jahja Sinuar. Ministri i Jashtëm, Israel Katz, njoftoi ekzekutimin e tij në një mesazh që u ka dërguar disa homologëve nëpër botë. Ai ka thënë se lideri i Hamasit u vra nga ushtarët izraelitë, ndërsa e përshkroi atë si “organizator prapa masakrës dhe mizorive” të 7 tetorit të një viti më parë. “Është një arritje e madhe ushtarake dhe morale për Izraelin dhe një fitore për gjithë botën e lirë kundër boshtit të së keqes të islamit radikal të udhëhequr nga Irani. Eliminimi i Sinuarit hap mundësinë për lirimin e menjëhershëm të pengjeve dhe hap rrugën për një ndryshim që do të çojë në një realitet të ri në Gaza – pa Hamas dhe pa kontroll iranian”, ka shkruar Katz. Kryeministri i Izraelit, Benjamin Netanyahu, reagoi gjithashtu pas vrasjes së liderit të Hamasit duke e cilwsuar atw arkitektin e “masakrës më të keqe në historinë e izraelitëve që nga Holokausti” dhe se e pagoi çmimin e asaj që bëri më 7 tetor të vitit të kaluar. Netanjahu tha se ushtria vërtetë “kreu punë” me Sinuarin, “por detyra ende nuk ka përfunduar”. Ai shtoi se Izraeli do ta vazhdojë luftën derisa pengjet të kthehen në shtëpi. “Kthimi i pengjeve është një mundësi që na afron më afër fundit të luftës. Kushdo që e lë armën dhe i kthen pengjet tona, do të lejohet të largohet dhe të jetojë. Por kushdo që i lëndon pengjet, do ta paguajë me jetën e tij”, paralajmëroi Netanjahu.