Presidentja e Kosovës, Vjosa Osmani zhvilloi këtë të hënë një telefonatë me Ndihmëssekretarin amerikan të Shtetit për Evropën dhe Euroazinë, James O'Brien, ku diskutoi për çështjen e dialogut me Serbinë si dhe për hapat e Kosovës drejt anëtarësimit në Këshillin e Europës. Institucion ky ku Prishtina zyrtare ka aplikuar prej vitit 2022 për t’u bërë pjesë e tij dhe që vendimi pritet të merret shumë shpejt. Osmani pa zbardhur shumë detaje nga diskutimet tha se pati një bisedë produktive me ndihmëssekretarin amerikan James O’Brien. “Theksova rëndësinë e të punuarit së bashku me aleatët tonë të SHBA-së në mbrojtjen e lirisë, pavarësisë dhe demokracisë sonë. Ne diskutuam gjithashtu hapat e Kosovës për anëtarësim në Këshill të Evropës dhe zbatimin e plotë dhe të shpejtë të Marrëveshjes së Brukselit”, shkroi në rrjetet sociale Osmani. Komiteti për Politikë dhe Demokraci i Këshillit të Evropës, më 27 mars ka miratuar raportin e raportueses për Kosovën, Dora Bakoyannis, ku rekomandohet që shteti ka përmbushur kushtet për t’u bërë anëtare e plotë e Këshillit të Evropës. Vendimi I radhës do të merret në 18 prill. Ndërkohë Serbia e ka kundërshtuar një gjë të tillë, duke kërkuar që kërkesa të refuzohet.