Presidentja e Kosovës, Vjosa Osmani, është angazhuar në SHBA në një seri takimesh me zyrtarë të Kongresit me në fokus mbështetjen amerikane për shumë sektorë të vendit. Osmani tregoi përmes disa postimeve në Facebook se ka biseduar tashme me senatorët republikanë: Ted Cruz, Joni Ernst dhe Thom Tillis, si dhe kongresismenët, Gary Palmer dhe Pete Sessions. “Bashkëpunimi dhe komunikimi i rregullt janë kyç për veprim të duhur në kohë të duhur. Kosova dhe SHBA-të, kanë hapësirë e mundësi të shumta për hapjen e kapitujve të rinj të bashkëpunimit, ndaj ky edhe është një nga objektivat kryesor në rrugëtimin përpara”, deklaron ajo. Një vëmendje të vecante, sic shpjegon Osmani, ka marrë bashkëpunimi në fushën e sigurisë, me qëllim parandalimin e atyre që i përshkroi si “përpjekjeve të aktorëve të dëmshëm për më shumë “kaos dhe jostabilitet”. Vizita e Osmanit në SHBA vjen pak javë përpara ceremonisë së inaguruimit të presidentit të zgjedhur amerikan, Donald Trump. SHBA-ja ka ndarë mbi 2 miliardë dollarë për Kosovën prej vitit 1998, dhe përkrahja e saj ka qenë vendimtare, përfshirë rrugën drejt pavarësisë. Udhëheqës shtetërorë kosovarë e përsërisin shpesh që Amerika është partnerja më e rëndësishme e Kosovës dhe se mbështetja e saj është jetike. Megjithatë, në disa raste, viteve të fundit, raportet e Uashingtonit me Qeverinë e Kosovës janë tendosur, pavarësisht se në publik zyrtarë qeveritarë në Prishtinë kanë përsëritur vazhdimisht se koordinohen dhe kanë bashkëpunim të ngushtë me SHBA-në.