Qeveria e kryeministrit hungarez Viktor Orban ka nisur një fushatë të re politike që synon të sfidojë axhendën e Bashkimit Evropian, këtë herë në lidhje me anëtarësimin e ardhshëm të Ukrainës në BE. Përmes një “konsultimi popullor” që i ngjan një referendumi, votuesit hungarezë kanë filluar të marrin me postë fletëvotime që i ftojnë të shprehin mendimin e tyre mbi këtë çështje. Edhe pse nuk ka vlerë juridike, votimi synon të legjitimojë qëndrimin e Orbanit ndaj Brukselit dhe ta forcojë pozicionin e tij politik brenda dhe jashtë vendit. Në rrugët e Hungarisë janë shfaqur postera gjigantë që portretizojnë presidenten e Komisionit Evropian, Ursula von der Leyen, dhe presidentin ukrainas, Volodymyr Zelensky, me mbishkrimin: “Ne nuk do t’i lejojmë ata të vendosin për ne!” – një mesazh i qartë për të nxitur ndjenjat kundër ndërhyrjes së Brukselit në çështjet kombëtare. Ai argumenton se një hap i tillë do të kishte pasoja të rënda për Hungarinë, duke rrezikuar fermerët, vendet e punës dhe sistemin e pensioneve. Sipas tij, Ukraina nuk mund ta fitojë luftën kundër Rusisë dhe pranimi i saj në BE do të shënonte fillimin e shpërbërjes së Unionit. “Nëse Europa nuk ka asgjë për të ofruar, atëherë ne do të shohim interesin e kombit tonë”, ka thënë ai.