Opozita ka caktuar datën 19 nëntor për protestën e radhës. Tubimi është vendosur të organizohet të martën para Parlamentit të Shqipërisë, pasi atëherë parashikohet që të mbarojë dhe debati për buxhetin. Kryetarët e degëve të PD-së janë lajmëruar se të martën e ardhshme, më 19 nëntor në orën 17.00 opozita do të protestojë përpara Kuvendit të Shqipërisë për të kundërshtuar miratimin e buxhetit. Në mesazhin që u është drejtuar kryetarëve të degëve u kërkohet që të sigurojnë pjesëmarrjen. Kreu i Partisë Demokratike, Sali Berisha, gjatë një konference me gazetarët njoftoi se do të mbajnë një protestë para Kuvendit, ditën e seancës plenare kur do të miratohet Buxheti i Shtetit për vitin 2025. Berisha tha se ata do të paraqesin amendamentet e tyre në komisione dhe seancë plenare në lidhje me buxhetin, por u shpreh i sigurt se ato do të refuzohen nga mazhoranca. Buxheti i Shtetit për vitin 2025 pritet të miratohet në parim në një seancë maratonë të hënën dhe të martën e ardhshme në Kuvend.