Sali Berisha zbriti në rrugët e Tiranës me skenar të ri në protestën e pestë kombëtare. Këtë herë, ai kurseu godinën e Kryeministrisë, por forcën e tregoi para vilës së diktatorit Enver Hoxha. Breshëri molotovësh dhe fishekzjarrësh u hodhën ndaj godinës, që dikur ishte simbol i diktaturës, por sot është kthyer në një qendër kulture që strehon artistë të huaj. E gjithë godina u përfshi nga flakët e molotovëve, që shkaktuan dëme të shumta jashtë dhe brenda saj, siç tregojnë dhe pamjet e siguruara nga Top Channel. Ministri i Turizmit, Kulturës dhe Sportit, Blendi Goxhe, njoftoi se në momentin e hedhjes së molotovëve, brenda vilës së ish-diktatorit Hoxha kishte artistë. “12 artistë, shumica të huaj, e mes tyre edhe të rinj që vijnë nga vende me fronte lufte dhe që kanë përjetuar trauma, pikërisht sepse programi ka edhe natyrë sociale e solidare, ndodheshin aty, për fat pa pasoja, ndërsa po informojme e qetësojmë familjet. Një komunitet artistik që jeton e punon në atë objekt për të materializuar lirinë u terrorizua sot nga antiliria!”. Por, për Sali Berishën bombat e molotovit ndaj vilës së Enver Hoxhës kishin tjetër qëllim. “Ca njerëz me kostume të murrme, me uniforma të agjentëve të policisë kriminale, u thonë protestuesve se këtu tani banon Edi Rama. Dhe ata iu kthyen. Pra, ato fishekzjarre që u hodhën aty ishin kundër Edi Ramës, urrejtje për Edi Ramën”.