Aksionet në kompanitë evropiane të naftës pësuan rritje pas raporteve se Organizata e Vendeve Eksportuese të Naftës dhe aleatët e saj do të vendosin një shkurtim të thellë të prodhimit gjatë takimit që planifikohet të zhvillojnë më vonë gjatë javës, në përpjekje për të stabilizuar cmimin në rënie të arit të zi. OPEC i udhëhequr nga Arabia Saudite dhe Rusia, po shqyrton mundësinë e një tkurrje të prodhimit me më shumë se 1 milion fuçi naftë në ditë. Për këtë cështje, grupi mblidhet të mërkurën, takimi i parë fizik ky i krerëve të tij që prej marsit 2020. Gjigandët e naftës, BP, Shell dhe TotalEnergies, patën që të gjitha rritje në bursa. Sinjale mbërritën po kështu dhe për rritjen e cmimit të naftës Brent të tregtuar në Londër. Ulja e prodhimit të OPEC-ut paralajmërohet në mesin e pakënaqësive nga disa anëtarë të tij, të cilët insistonin se rënia e fundit e cmimit të naftës bruto nuk kishte asnjë bazë. Ndërhyrja e tyre për shkurtimin e prodhimit synon pikërisht të stabilizojë cmimet. Por ajo nga ana tjetër mund të komplikojë së tepërmi përpjekjet e qeverive në mbarë botën për të ulur kostot e energjisë që kanë shkaktuar një rritje galopante të inflacionit. Kuotimi i naftës ra me 11.2% në shtator, muaji më i keq i cmimit të saj në gati një vit, e gjithë kjo pasi Rezerva Federale në SHBA dhe bankat e tjera qendrore ngritën shqetësimet se rritja ekonomike do të ngadalësohet në mënyrë drastike përballë rritjes së normave të interesit.Tregje po kështu u mbushën me naftë pasi Shtetet e Bashkuara përdorën rezervat e tyre strategjike, cka bëri që ato vetë të uleshin në nivelin e tyre më të ulët në gati 40 vjet.