Olaf Scholz nuk do të përballet me votëbesimin në parlament dhe nuk dëshiron zgjedhje të parakohshme. Kancelari gjerman insiston se qeveria e ka shumicën për të kryer detyrat e saj. Politikani socialdemokrat pohoi për ZDF-në se këto janë ide të hedhura prej opozitës çdo dy- tre javë. Scholz mendon, se krijimi i qeverisë në Gjermani edhe për disa kohë do të vazhdojë të mbetet i vështirë. "Nëse më lejohet të ndaj me ju se ku më dhemb: Druaj se çfarëdo që të ndodhë në vitet e ardhëshme, edhe për shumë shumë vite në Gjermani do të kemi konstelacione, në të cilat do të jetë mjaft e ndërlikuar të krijohet qeveria. "Këtë do ta shohim në federatë si edhe në lande". Si rrjedhojë, thekson kancelari, "do të varet, se si ne do të arrijmë bashkarisht një stil, që të qeverisin bashkë parti, të cilat në themelimin e tyre as që e kishin menduar të bashkëpunojnë, e megjithatë qeverisja të funksionojë duke pasur arritje." Në këtë nivel koalicioni aktual ka arritur shumë, pohon ai. Scholz megjithatë u shpreh i gatshëm për kompromise në bisedimet e reja të mundshme lidhur me temën e migracionit midis qeverisë, opozitës dhe landeve. "Ne kemi kthime në kufi, kemi kontrolle kufitare, dhe një menaxhim efikas kufiri, gjë që duam ta zgjerojmë edhe më tej edhe me mbështetjen e opozitës", tha Scholz, ndërsa e hodhi poshtë me forcë idenë se koalicioni qeverisës e ka nënvleftësuar temën e emigracionit.