Asambleja e Përgjithshme e Kombeve të Bashkuara miratoi me 84 vota pro, 19 kundër dhe 68 abstenime, rezolutën që cakton 11 korrikun, si ditën e përkujtimit të gjenocidit të vitit 1995 në Srebrenicë të Bosnjës. Aty ku serbët e Bosnjës vranë më shumë se 8,000 burra dhe djem myslimanë boshnjakë. Rezoluta u miratua mes kundërshtimit të ashpër të palës serbe si në Bosnje ashtu edhe në Serbi. Teksti përfundimtar i rezolutës që është hartuar nga Gjermania dhe Ruanda, dënon mohimin e gjenocidit. Mbështetëse të kësaj nisme edhe Shtetet e Bashkuara, Shqipëria, Bosnja, Kili, Finlanda, Zelanda e Re, Turqia dhe vende të tjera. Presidenti i Serbisë, Aleksandar Vuçiç para votimit në Asmablenë e Përgjithshme të Kombeve të Bashkuara tha se rezoluta është thellësisht politike dhe se po thellon ndarjet ne rajon. Gjykata Ndërkombëtare e Drejtësisë në Hagë e karakterizoi krimin në Srebrenicë si gjenocid në vitin 2007. Gjykata konstatoi se Serbia nuk ishte përgjegjëse për aktin e as bashkëpunëtore, por deklaroi se ajo nuk bëri asgjë për ta parandaluar atë. Pamjet: AFP