Kreu i agjencisë së OKB-së për refugjatët palestinezë, UNRWA, u ka kërkuar vendeve që kanë ndërprerë financimin që të rishqyrtojnë vendimin e tyre të cilin e përshkroi si "tronditës". “Mbi dy milionë njerëz në Rripin e Gazës varen nga këto ndihma për mbijetesën e tyre të plotë", deklaroi Philippe Lazzarini. Tetë vende, përfshirë Britaninë e Madhe, vendosën të pezullonin ndihmën e tyre pas deklaratave të Izraelit se disa pjesëtarë stafi të UNRWA-s ishin të përfshirë në sulmet vdekjeprurëse të Hamasit të 7 tetorit në shtetin hebre. Agjencia sqaroi se është duke hetuar dhe personat në fjalë, janë shkarkuar tashmë. Izraeli ka akuzuar prej kohësh degë të ndryshme të OKB-së – përfshirë UNRWA-n – për paragjykim e madje edhe për antisemitizëm. Vendet që tani kanë pezulluar financimin e UNRËA janë Australia, Kanadaja, Finlanda, Gjermania, Italia, Holanda, Britania e Madhe dhe SHBA. E krijuar në vitin 1949, Agjencia e Kombeve të Bashkuara për Ndihmë dhe Punë, UNRWA, është agjencia më e madhe e OKB-së që vepron në Gaza. Ajo ofron kujdes shëndetësor, arsim dhe ndihma të tjera humanitare për palestinezët në Gaza, Bregun Perëndimor, Jordani, Liban dhe Siri dhe punëson brenda enklavës rreth 13,000 vetë. Sulmet e 7 tetorit në jug të Izraelit, kur u vranë 1.200 persona dhe u rrëmbyen afër 250 të tjerë, nxitën luftën në Rripin e Gazës. Fushata shpaguese ajrore dhe tokësore e shtetit hebre në këtë territor i ka kushtuar deri tani jetën më shumë se 26 mijë palestinezëve, shumica e të cilëve gra e fëmijë.