Një gjykatë në Serbi ka dënuar të hënën prindërit e një adoleshenti i cili vrau nëntë nxënës dhe një roje shkolle vitin e kaluar, si dhe plagosi gjashtë persona të tjerë në një shkollë fillore në qendër të Beogradit. Sulmuesi, i identifikuar si Kosta Kecmanoviç, ishte 13 vjeç kur kreu krimin në shkollën “Vladislav Ribnikar” në qendër të Beogradit më 3 maj 2023, dhe për këtë arsye shumë i ri për t'u përballur me gjykim, sipas ligjit serb. Prindërit e tij u arrestuan menjëherë pas sulmit dhe u akuzuan për mosmbajtjen e armëve larg djalit të tyre. Gjykata e Lartë në Beograd e dënoi Vladimir Kecmanoviçin, babanë e djalit, me 14 vjet e gjashtë muaj burgim për “vepra të rënda kundër sigurisë publike” dhe për "neglizhencë ndaj fëmijës". Nëna, Miljana Kecmanoviç është dënuar me tre vjet burgim për neglizhencë ndaj fëmijës, por është liruar nga akuzat për armëmbajtje pa leje. "Ky është një mesazh i rëndësishëm për shoqërinë si një formë parandalimi, kështu që diçka e tillë nuk do të ndodhë më kurrë”, ka thënë Ninela Radiceviç, nëna e Ana Bozoviç, një nga viktimat e të shtënave masive. Adoleshenti që kreu krimin përdori armët e babait të tij për të hapur zjarr ndaj shokëve të tij dhe të tjerëve. Ai hyri në shkollë dhe fillimisht hapi zjarr në sallë përpara se të shkonte në një klasë ku vazhdoi të qëllonte. Ndërkohë, me 15 muaj burgim për dëshmi të rreme për këtë rast është dënuar edhe një instruktor qitjeje, i cili punonte në një shesh qitjeje ku adoleshenti i dyshuar ushtronte gjuajtjen.