Bashkimi Evropian ka përgatitur sanksione kundër Kosovës, si ndëshkim për mosplotësimin e kërkesave të tyre për situatën e tensionuar në veri. Sanksionet fillestare përshijnë pezullimin e ftesave për pjesëmarrjen e Kosovës në ngjarjet e nivelit të lartë dhe vizitave dypalëshe nga Bashkimi Evropian dhe vendet anëtare. Takime do të ketë vetëm kur ato duhet të zhvillohen për t’u fokusuar në adresimin e krizës në veri të Kosovës dhe hapave për gjetjen e zgjidhjes. Radio Evropa e Lirë mëson se hapi tjetër pritet të përfshijë punën e përbashkët të grupeve që ekzistojnë mes Kosovës dhe BE-së, e të cilat janë krijuar në bazë të Marrëveshjes së Stabilizim Asociimit (MSA). Do të ketë edhe pasoja financiare për Kosovën. Është planifikuar një pezullim domethënës i financimit nga ana BE-së i disa projekteve për të cilat ka dhënë propozime Kosova në kuadër të Fondit investues për Ballkanin Perëndimor. Ndër të tjera BE, si sanksion ndaj Kosovës, pritet që të ulë nivelin e pranisë publike në zhvillimet dhe ngjarjet e përbashkëta ku marrin pjesë anëtarët e Qeverisë së Kosovës. Burimet diplomatike kanë raportuar se angazhimi me autoritetet e Kosovës do të kthehet në nivel normal sapo Qeveria e Kosovës të ndërmarrë hapa që BE-ja i pret në kuadër të dialogut, përfshirë tërheqjen policisë nga ndërtesat e komunave në veri dhe shpallja e zgjedhjeve të reja lokale. Në lidhje me këto sanksione të parapërgatitura ka reaguatr edhe zëdhënësi I BE-së Peter Stano, i cili iu është përgjigjur interesimit të mediave në Kosovë. Ai njofton se kanë ndarë me shtetet anëtare të BE-së një përmbledhje të masave që duhen marrë, nëse kryeministri Kurti nuk ndërmerr hapat për qetësimin e situatës. Ndër të tjera Stano shton se diskutimet midis vendeve anëtare të BE-së janë në vazhdim dhe Përfaqësuesi i Lartë Borrell është në kontakt të vazhdueshëm me liderët në rajon dhe të vendeve anëtare të BE-së.