Rusia ka lëshuar një fletarrestim për Yulia Navalnayan, pasi e akuzon figurën opozitare në mërgim për pjesëmarrje në një “organizatë terroriste”. Një gjykatë ruse ka miratuar “kërkesën e hetuesve dhe ka vendosur për masa parandaluese në formë të paraburgimit për dy muaj”. Navalnaya është zotuar se do të vazhdojë punën e bashkëshortit të saj, Aleksei Navalny, kundërshtarit kryesor të presidentit rus, Vladimir Putin, i cili vdiq në një burg në Arktik në shkurt. Pas lajmit për fletarrestim, ajo reagoi duke e cilësuar Vladimir Putinin vrasës dhe kriminel lufte. Ai e ka vendin në burg, tha Yulia. Organizatat e Navalnyt janë të jashtëligjshme në Rusi, janë shpallur “ekstremiste” dhe gjenden në listën e “terrorizmit” të shtetit. Navalnaya, me profesion ekonomiste, qëndroi pranë bashkëshortit të saj i cili organizoi protesta masive në Rusi dhe u largua nga Rusia bashkë me bashkëshortin për t’u trajtuar nga një helmim më 2021, duke e ditur se me t’u kthyer ai do të arrestohej.