Nxënës të gjimnazit “Sulejman Delvina” kanë protestuar sot përpara ambienteve të Komisariatit të Policisë në Delvinë, pas një incidenti të rëndë të ndodhur në shkollën e tyre. Protesta vjen pas një përplasjeje mes dy nxënësve që përfundoi me përdorimin e një thike. Si pasojë e konfliktit, është plagosur Dhionis Cavo, 16 vjeç, i cili ka marrë katër goditje me thikë në pjesën e shpatullës. Sipas nxënësve, autori i dyshuar i ngjarjes është Frenki Hamiti, 15 vjeç, gjatë incidentit ka mbetur i plagosur në dorë edhe një tjetër adoleshent, Mikahel Muho. Nxënësit që morën pjesë në protestë shprehen se situata problematike në shkollë është denoncuar disa herë më parë në drejtori, por sipas tyre nuk janë marrë masa konkrete për të parandaluar përshkallëzimin e konfliktit. Edhe pse, sipas tyre, një nga nxënësit kishte shfaqur më parë sjellje problematike, ata pretendojnë se nuk është ndërhyrë në kohë për të shmangur incidentin. Ngjarja, sipas dëshmive të nxënësve, ka nisur brenda ambienteve të shkollës dhe më pas është agravuar pasi të rinjtë janë larguar nga mjediset e saj. Nxënësit pretendojnë gjithashtu se prindërit nuk janë njoftuar për incidentin dhe se nxënësi i përfshirë në konflikt është lejuar të largohet nga shkolla para përfundimit të orarit mësimor.