Presidenti ukrainas Volodymyr Zelensky tha sot se do të shtyjë vizitën e tij në Arabinë Saudite, pasi Kievi u përjashtua nga bisedimet SHBA-Rusi në Riyadh. Një ditë më parë Zelensky tha se ai kishte planifikuar të vizitonte Arabinë Saudite gjatë kësaj jave. “Ne nuk ishim të ftuar në takimin ruso-amerikan në Arabinë Saudite. Ishte surprizë për ne. Mendoj se ishte një surprizë për shumë njerëz. Ne jemi shumë të sinqertë dhe të hapur. Nuk dua të ketë rastësi. Kjo është arsyeja pse unë nuk do të shkoj në Arabinë Saudite”, tha Zelensky në një konferencë shtypi në Ankara, pas përfundimit të bisedimeve SHBA-Rusi në Riad. Zelensky tha se ai dëshiron që lufta të përfundojë, por shtoi se donte që marrëveshja të jetë e drejtë dhe që askush të mos bëjë veprime pas shpine. “Nuk mund të merren vendime për t’i dhënë fund luftës në Ukrainë, pa Ukrainën prezente, në asnjë lloj kushti”, theksoi Zelensky. Udhëheqësi ukrainas shtoi se ai pret që një delegacion amerikan të mbërrijë në Kiev së shpejti. Zelensky tha se Keith Kellogg, i dërguari i administratës Trump për çështjen Rusi-Ukrainë, i cili nuk ishte pjesë e delegacionit amerikan në Riyadh është planifikuar të vizitojë Ukrainën të enjten e kësaj jave.