Autoritetet e Republikës Islamike kanë ngritur alarmin për një ndotje të madhe pranë brigjeve të ishullit Kharg në Iran. Siç tregojnë pamjet sateliore, bëhet fjalë për një njollë të madhe nafte në ishullin që ndodhet në Ngushticën e Hormuzit. Burimi i derdhjes, fillimisht i vlerësuar të mbulonte afërsisht 50 kilometra katrorë, është ende i paqartë, por tashmë ka akuza të ndërsjella midis Teheranit dhe Evropës. Sipas Iranit, njolla u shkaktua nga "mbetjet e naftës dhe uji i balastit nga cisternat evropiane që u hodhën në det, duke dëmtuar mjedisin detar". Megjithatë, sipas Observatorit të Konfliktit dhe Mjedisit derdhja mund të jetë shkaktuar nga infrastruktura iraniane e naftës. Më parë, kompania e monitorimit të derdhjeve të naftës Orbital Eos analizoi imazhet satelitore duke sqaruar se: "Edhe pse infrastruktura në det të hapur në zonë mund të jetë një burim potencial, aktualisht nuk jemi në gjendje të identifikojmë një pikë origjine përfundimtare ose t'ia atribuojmë derdhjen një shkaku specifik ". Moussa Ahmadi, kreu i Komitetit të Energjisë të Parlamentit Iranian, i tha agjencisë së lajmeve ISNA se "deri më tani nuk ka pasur asnjë raport zyrtar që konfirmon" rrjedhjet nga infrastruktura e naftës e Iranit për shkak të problemeve me kapacitetin e magazinimit. Disa media, përfshirë Fox Neës , kanë spekuluar se infrastruktura në det të hapur e Republikës Islamike mund të jetë nën presion për shkak të bllokadës detare amerikane, duke penguar aftësinë e Teheranit për të eksportuar ose ruajtur naftë bruto.