29-nëntori shënon një vit nga vrasja makabre e Liridona Ademajt që tronditi mbarë opinionin në Kosovë e Shqipëri, por jo vetëm. Ishte mbrëmja e datës 29, ku në fshatin Bërrnicë të Prishtinës, u vra Liridona Ademaj. Fillimisht ngjarja u raportua si vrasje si pasojë e grabitjes, por hetimet morën një rrjedhë të frikshme, me skenarin e bashkëshortit të saj vrasës që nuk ishte parë as në filma. Atë natë, 30-vjeçarja ndodhej në automjet me fëmijët dhe bashkëshortin, Naim Murseli, i cili dyshohet se porositi vrasjen. Ajo u qëllua me plumb në qafë, në prani të fëmijëve të saj. Dyshimet janë se vrasjen e kishte kryer Granit Plava, me urdhër të Murselit i cili i kishte premtuar 30 mijë euro. I dyshuar është edhe nipi i Murselit, Kushtrim Kokalla, që ishte pjesëtar i FSK’së. Ata u arrestuan ditën ku u varros Liridona, ndërsa çka e rëndoi këtë ngjarje tragjike, ishte se vëtë bashkëshorti i saj mori pjesë në ceremoninë mortore duke pritur ngushëllimet për vrasjen që ai vetë kishte porositur.