Nxënësi 14-vjeçar, Martin Cani, që u vra me thikë në mënyrë tragjike nga një bashkëmoshatar, në nëntor të vitit 2024, tashmë do të përkujtohet edhe përmes një mini-fushe futbolli. Në nder të të futbollistit të ndjerë, Federata Shqiptare e Futbollit vendosi të ndërtojë një mini-fushë, që do të mbajë emrin e të miturit. Në ceremoninë e inaugurimit ishin të pranishëm anëtarja e Komitetit Ekzekutiv të FSHF-së, Anila Basha, si dhe familjarët e Martin Canit, në një moment të mbushur me emocion dhe mirënjohje. Dy prindërit e Martin Canit vlerësuan këtë gjest, duke e cilësuar si një kontribut për brezat e rinj. Ky investim i Federatës Shqiptare të Futbollit shkon përtej infrastrukturës sportive. Ai përfaqëson një simbol të kujtesës dhe shpresës, si dhe një mesazh të fortë për rolin që sporti luan në edukimin, përfshirjen dhe zhvillimin e shoqërisë.