Kandidati për president i SHBA, Donald Trump ka falënderuar gruan që pikasi autorin që dyshohet se po planifikonte atentat ndaj tij në fushën e tij të golfit. Në daljen e tij të parë publike që nga incidenti, kandidati republikan presidencial i tha mbështetësve se gruaja e paidentifikuar, pa diçka që nuk po shkonte teksa po ecte me automjetin e saj. Ajo e dalloi të dyshuarin duke vrapuar drejt makinës së tij, kështu që e ndoqi atë në automjet dhe i bëri fotografi të targës së tij, tha Trump. “Doni të dini një lloj mrekullie?” i tha Trump mbështetësve pasi lavdëroi Shërbimin Sekret. “Një grua, duke vozitur në një makinë, pa një burrë në rrugë duke vrapuar. Ajo e ndoqi atë. Dhe ai hipi në makinë. Ajo ndaloi sepse mendoi se ai ishte i dyshimtë. E ndoqi atë, nuk ishte shumë larg, dhe parkoi makinën pas makinës së tij dhe filloi të fotografonte targën e tij. Seriozisht, kush do ta bënte këtë?” tha ai, duke shtuar se “ajo ishte vërtet e mrekullueshme”. Trump tregoi se ajo i dërgoi me shpejtësi ato imazhe autoriteteve. “Gratë janë më të zgjuara se burrat”, i tha ai turmës, duke shtuar se do të donte ta takonte.