Pas arrestimit të Majlind Habibit për vrasjen me dashje të Branko Shkozës në Spitallë të Durrësit, situata e familjarëve të Habibit paraqitet kritike. Ata kanë mbyllur derën e shtëpisë dhe janë larguar nga frika e hakmarrjejes. I frikësuar, Ilir Habibi, vëllai i të dyshuarit, është larguar nga Durrësi së bashku me familjen e tij. Ai tregon për jetën e vështirë në arrati. Sipas tij, vendimi për ta lënë Majlindin pa avokat dhe për të mos e mbështetur në gjykatë ishte i qëllimshëm, pasi vëllai kishte pranuar krimin. Ai e përshkruan vëllain e tij si një njeri impulsiv, por njëkohësisht të ndikuar lehtë nga rrethanat dhe presioni. Deklarata e Majlind Habibit në seancën gjyqësore, ku mohoi të ketë kryer krimin dhe pretendoi se e kishte pranuar atë nën presion, ka tronditur familjen. Iliri pranon se kjo i ka bërë të rivlerësojnë situatën. I larguar nga Durrësi për të shmangur hakmarrjen e mundshme, Ilir Habibi shpreh shqetësimin për sigurinë e familjes dhe fatin e tre fëmijëve të tij të mitur. Ai bën apel për ndihmë dhe drejtësi në këtë situatë të pazakontë. Ngjarja tragjike e 2 dhjetorit, ku 33-vjeçari Branko Shkoza humbi jetën nga mbytja në kanalin e ujërave të ndotura, vazhdon të jetë e mbuluar me pikëpyetje. Ndërkohë, familjarët e Majlind Habibit po përballen me pasojat e një ngjarjeje që ka ndryshuar rrënjësisht jetën e tyre.