Ka mjaftuar vetëm një ditë shi, gjatë së shtunës që në qytetin e Durrësit të rikthehen përmbytjet. Reshjet e dendura të shiut shkaktuan probleme në disa kryqëzime dhe rrugë të qytetit bregdetar të dhe zonave përreth, duke vështirësuar ndjeshëm qarkullimin rrugor. Situata u paraqit më problematike në kryqëzimin pranë stadiumit “Niko Dovana”, atij pranë shkollës "Qemal Mici", tregut, si dhe në disa segmente rrugore në lagje të ndryshme të qytetit. Probleme janë evidentuar edhe në zonën e ish-Kënetës, Shkozetit dhe atë të Plazhit, ku uji ka pushtuar rrugët duke vështirësuar kalimin për këmbësorët dhe automjetet. Kjo është një situatë e përsëritur në Durrës pas çdo rrebeshi shiu duke nxjerrë në pah nevojën për pastrimin e vazhdueshëm të kanaleve ekzistuese dhe investime të reja në infrastrukturën e kanalizimeve.