Në një zonë të rrethuar specialistë të policisë po grumbullojnë mbetjet nga një shprthim i fuqishëm i një bombe mbrëmjen e se premtes , jashtë ndërtesës së zyrave të Hellenic Train në bulevardin Syggrou të Athinës. Shpërthimit i ka paraprirë një telefonatë paralajmërimi , në orën 20:53, nga një person i panjohur tek portali Zougla dhe Gazeta e Redaktorëve , i cili ka dhënë një afat kohor prej 35-40 minutash. Forca e shpërthimit ka qenë aq e madhe, sa është dëgjuar deri në sheshin Sintagma, ku po zhvillohej një tubim proteste pensionistësh. Informacionet paraprake bëjnë me dije se në një motoçikletë pa targa është gjetur një çantë shpine e dyshimtë e mbyllur me dryn, brenda së cilës ishte vendosur bomba , që ka shpërthyer pikërisht në momentin që ka paralajmëruar i panjohuri. Një ekip i Departamentit të Asgjesimit të Mjeteve Shpërthyese i Policisë Greke kishte shkuar më herët në vendngjarje, por nuk pati kohë të kryente një shpërthim të kontrolluar. Sipas policisë nuk ka të lënduar, ndërsa po ekzaminohen në laboratorët e mjekësisë ligjore të gjitha mbetjet e marra në vengjarje. Hellenic Train është kompania e trenave në Greqi, e cila ndodhet në qëndër të hetimeve për aksidentin tragjik në Tempi para dy vitesh, ku humbën jetën 57 persona, shumica të rinj. Ngjarja ndodhet ende në qëndër të vëmendjes së opinionit publik të Greqisë, dhe gjithë partitë opozitare vazhdojnë të kritikojnë përsëri qeverinë e kryeministrit Mitsotakis për mbulimin e fajtorëve të aksidentit.