Palestinezët po ikin nga sytë këmbët nga qyteti i Gazës ku ushtria izraelite nisi sot fazat e para të ofensivës së paralajmëruar tokësore. Tanket izraelite hynë që në mëngjes në periferitë e qytetit, që është shtëpi e mbi një milion palestinezëve. Mësymja nga toka vjen pas disa bombardimesh intensive dhe zjarri artilerie. Ajo ka bërë që Sekretari i Përgjithshëm i OKB-së, António Guterres, të ripërtërijë thirrjet për një armëpushim të menjëhershëm "për të shmangur vdekjen dhe shkatërrimin" që një sulm do të "shkaktonte në mënyrë të pashmangshme". Por kritikat ndërkombëtare po bien në vesh të shurdhër. Izraeli e ka bërë të qartë se pavarësisht reagimeve, ai ka ndërmend ta zbatojë deri në fund planin e vet për të pushtuar të gjithë Qytetin e Gazës. Madje, sipas një zëdhënësi të ushtrisë izraelite, kërkesa e kryeministrit Benjamin Netanyahu është që qyteti merret edhe më shpejt nga sa ishte planifikuar.