Një ngjarje e rëndë ka tronditur Meksikën, ku një 63-vjeçare dyshohet se ka vrarë nusen e saj me 6 plumba, brenda banesës. Krimi i rëndë ndodhi në prani të djalit të autores dhe foshnjës 8-muajshe të çiftit, duke e bërë ngjarjen edhe më dramatike. Pas vrasjes, autorja e dyshuar është larguar nga vendi i ngjarjes, ndërsa policia vijon kërkimet për kapjen e saj. Sipas mediave lokale, ajo i ka thënë të birit pas krimit se nusja e kishte mërzitur, pasi sipas saj, i kishte “marrë” dashurinë e djalit. Viktima ishte 27 vjeçe dhe më parë kishte fituar titullin “Miss Teen Universe” në vitin 2017. Pamjet e publikuara tregojnë momentet e fundit para krimit, ku e reja shihet duke ecur në dhomën e ndenjës, mes lodrave dhe sendeve të foshnjës. Pak çaste më vonë dëgjohet një e shtënë arme, e pasuar nga të tjera. Policia në Mexico City ka nisur hetimet dhe ka identifikuar si të dyshuar kryesore vjehrrën e viktimës, por ende nuk ka akuza zyrtare. Autoritetet po hetojnë edhe arsyet pse ngjarja nuk u raportua menjëherë, por vetëm një ditë më vonë. Sipas nënës së viktimës, bashkëshorti mund të ketë hezituar nga frika se foshnja do të përfundonte në kujdestari shtetërore.