Një natë pushimesh në Ksamil u kthye në tragjedi për një grup turistësh portugezë. Në orën 05:15 të mëngjesit të 18 gushtit, në ambientet e lokalit “Principote”, një konflikt mes disa personave përshkallëzoi në dhunë dhe më pas në vrasjen e 20-vjeçarit portugez Luis Miguel Varela Mendes.Sipas hetimeve, 29-vjeçari Sokrat Lipan, alias Sokrat Vata, dyshohet se e ka goditur disa herë me thikë të riun portugez. Në konflikt është përfshirë edhe David Heurtevent, i shpallur në kërkim, i cili dyshohet se e ka goditur 20-vjeçarin me grushte. Para goditjes me thikë, në përleshje dyshohet se janë përfshirë edhe katër kamarierë të lokalit “Principote”: Serxhi Selimi, 24 vjeç, Ervis Bunci, 24 vjeç, Ildi Cekani, 21 vjeç, dhe Murat Zhabina, 27 vjeç. Sipas policisë, ata e kanë goditur me grushte 20-vjeçarin dhe më pas janë larguar nga vendi i ngjarjes. Por pas vrasjes nis edhe arratisja e autorit të dyshuar.