Anthony Fauci, refuzoi t’u përgjigjet pyetjeve të senatorëve për origjinën e COVID-19 dhe mënyrën se si Shtetet e Bashkuara menaxhuan pandeminë. Gjatë një seance treorëshe të Komisionit të Senatit për Sigurinë Kombëtare, 85-vjeçari përdori më shumë se 100 herë Amendamentin e Pestë, i cili mbron një person nga detyrimi për të dhënë dëshmi që mund të përdoren kundër tij. Seanca u drejtua nga republikani Rand Paul, kundërshtari më i ashpër i Faucit. Paul akuzon ish-drejtuesin e Institutit të Sëmundjeve Infektive se ka mashtruar Kongresin për financim të kërkimeve mbi koronaviruset në Institutin e Virologjisë në Wuhan. Fauci mohon akuzat. Në qendër të debatit janë vendosur edhe 1 mijë e 141 faqe nga ditari i Faucit gjatë viteve të pandemisë, të publikuara nga Rand Paul. Senatori thotë se shënimet private bien ndesh me deklaratat publike të ish-zyrtarit. Paul ka publikuar gjithashtu mesazhe të shkencëtarëve, sipas republikanëve, komunikimet tregojnë se autorët diskutonin privatisht mundësinë e rrjedhjes nga një laborator, ndërsa publikisht jo. Fauci i cilësoi akuzat shpifëse dhe tha se Rand Paul po zhvillon një fushatë për ta dërguar atë në burg. Demokratët e cilësuan një proces politik me një përfundim të paracaktuar. Më shumë se 150 shkencëtarë kanë kërkuar ndalimin e asaj që e quajnë përndjekje të Faucit, duke deklaruar se nuk janë paraqitur prova të besueshme që e lidhin atë me krijimin ose fshehjen e origjinës së virusit. Origjina e COVID-19 mbetet e pazgjidhur. FBI-ja dhe CIA e konsiderojnë të mundshme rrjedhjen nga një laborator, por CIA e ka bërë këtë vlerësim me besueshmëri të ulët. Katër agjenci të tjera amerikane të inteligjencës dhe Këshilli Kombëtar i Inteligjencës favorizojnë teorinë e kalimit natyror të virusit nga kafshët te njerëzit.