Gara për zgjedhjet presidenciale të 5 nëntorit në Shtetet e Bashkuara duket tejet e ngushtë, e dëshmuar kjo edhe nga anketimi i fundit i opinionit publik nga Neë York Times dhe Siena College , një sondazh që gëzon një reputacion dhe besim të lartë mes amerikanëve. Nga 1,695 votuesit e regjistruar të anketuar midis 3-6 shtator 2024, 48% thanë se do të votonin për Trump, ndërsa 47% thanë se do të votonin për Kamala Harris. Avantazhi, në këtë situatë, konsiderohet i papërfillshëm duke marrë parasysh se marzhi i gabimit të sondazhit llogaritet në +/- 2.8%. Por ai tregon nga ana tjetër se kandidati republikan për president dhe rivalja e tij demokrate, kanë një nivel thuajse të njëjtë mbështetjeje në javët e fundit para zgjedhjeve. Sipas anketimit, votuesit mendojnë se u duhet ta njohin më mirë Harris, ndërsa mendimet e tyre për Trump janë kryesisht të përcaktuara. 28% e votuesve të mundshëm thanë se kishin nevojë për më shumë informacion mbi kandidaten demokrate, dhe vetëm 9% pohuan të njëjtën gjë për zotin Trump. Sondazhi nxjerr në pah faktin se debati presidencial i së martës mund të jetë një moment vendimtar për garënë presidenciale. Zv/presidentja Harris do të ketë mundësinë të japë më shumë detaje për politikat e saj kur të përballet me ish-Presidentin Trump për 90 minuta. Duke qenë se gara është kaq e ngushtë, atëherë edhe një rritje sado e lehtë embështetjes për secilin nga kandidatët do të ishte domethënëse.