Kryeministri i Izraelit, Benjamin Netanyahu, ka urdhëruar Forcat Mbrojtëse të Izraelit që të "sulmojnë me forcë objektivat e Hezbollahut në Liban", thuhet në një deklaratë nga zyra e tij. Këtë të shtunë Forcat Mbrojtëse të Izraelit (IDF) lëshuan një numër deklaratash në Telegram, duke akuzuar Hezbollahun për shkelje të armëpushimit, të rënë dakord midis Izraelit dhe Libanit. Ushtria izraelite njoftoi se Hezbollahu kishte lëshuar raketa në tre qytete të Izraelit, duke bërë që të ndizen sirenat e alarmin. E menjëhershme ishte kundërpërgjigjja e IDF, që sulmoi në Libanin Jugor, duke vrarë të paktën 15 ushtarë të Hezbollahut, grupit të shpallur terrorist nga Uashingtoni. “Vendet u sulmuan me qëllim eliminimin e një kërcënimi për ushtarët e IDF-së dhe civilët izraelitë, pas përdorimit të këtyre strukturave nga Hezbollahu për të kryer sulme kundër ushtarëve të IDF-së dhe Shtetit të Izraelit”, tha ushtria izraelite në një deklaratë. Më herët këtë javë, Presidenti i SHBA-së, Donald Trump, tha se një armëpushim midis Izraelit dhe Libanit do të zgjatet me tre javë. Si Izraeli, ashtu edhe Hezbollahu, kanë akuzuar njëri-tjetrin për shkelje të marrëveshjes së armëpushimit.